طول محنا عايشين هنتعرض لصدمات ونفشل ف تجارب
ونكسب ناس ونخسر ناس تانية
هنتخدع ف بعض
طول محنا عايشين اكيد هنغلط ونخلي غيرنا يقع ف الغلط وغيرنا يخلينا نقع ف الغلط
طول محنا عايشين هنتعلم
والعلام مش بالساهل
كذلك الحب
زي مافيه نجاح فيه فشل
فيه تجارب تكمل وتجارب تانية بتنتهي ف نص الطريق
او تنتهي ف بداية الطريق
الفشل ف الحب او ف تجربة او ف صدمه تاخدها من علاقتك بحد بتحبه وكان بيحبك
مش هي نهاية المطاف
مش هي آخر الدنيا
ومش هي كل حاجة
صحيح احنا بني ادمين ولازم الحاجات دي تأثر فينا بس المشكله انها او اننا بنسبها تأثر فينا اكتر من اللازم ..
لما بتصادف وتكلم مع حد فشل ف تجربة حب
ولد او بنت
الاقيها بتقولي خلاص انا مش هاحب تاني ومش هفكر ف الحب تاني
ومفيش حاجة اسمها حب أصلاا
غريبة ؟ طب م انت من يومين كنت بتحب
من يومين كنت طاير م الفرح ..ايه اللي جري بقا؟ وايه اللي حصل
ممكن اعتبر ان دة نوع من التنفيس عن الغضب اللي جوة ف القلب
لكن لما يوصل ان دة يخليك تاخد قرارات ممكن تندم عليها باقي عمرك كله
دة بقا اللي انا لازم أقف عنده
ودة اللي هيكون كلامنا النهاردة بسببه
عن ناس لما بتتصدم ف علاقة حب
ممكن تاخد قرارات تضرها وتضر ناس تانية ملهاش أي ذنب ف دة كله
وكان كل مشكلتها انها اتوجدت ف زمن ووقت مش مناسب ليها
زي مثلا حد تاني ممكن يتقدم بحبه للشخص المجروح دة
ف بكل بساطة ..يوافق أو توافق
يوافق وهو ميكونش فكر كويس ف القرار دة
يوافق وهو قلبه مجروح
فكر بعقله ومفكرش لحظة بقلبه انه يكون مبيحبوش
هو من جواة اصبح مؤمن ان مفيش حاجة اسمها حب
وان لو هرتبط تاني هيكون بالعقل عن غير حب
واختار اللي يحبني مختارش اللي بحبه
او للأسف ممكن يتاخد قرار أبشع من كل دة
وهو انه يرفض أي ارتباط تاني
ويحبس نفسه
ويقفل علي روحه اوقات كتييييرة اوي
........
...............
.................
كل دي نظريات بتظهر اول ماحد يفشل ف تجربة حب أو يتصدم فيه
ياتري دة صح؟
هل دة ينفع؟
انا من الخبرة قولت وبقول دايما
ان مفيش حياة هتقف علي حد ..علي أي حد
إلا أذا كان حد كان بيحبك جدا وكنت بتحبه جدا لكن الظروف هي اللي بعدتكوا غصب عنك وعنه
ورغم البعد انت لسه بتحب ..وهو لسه بيحب
عشان كدة لما بلاقي حد بيعاني من صدمة حب بقوله ..طلع كل اللي جواك
قول كل حاجة انت حاسس بيها
خد كل القرارات اللي ممكن تتخيلها انك تقولها
لكن دة لوقت ..ولوقت مش طويل
ولما تاخد قرار ونت ف حالة دي
ونت متعصب او منفعل او منهار ..متنفذوش
خد قرار وخليه مع ايقاف التنفيذ
لأنه أي كان القرار دة ايه فهو مش صح أو ع الأقل مش مناسب ليك
أنفعل ..اصرخ
كسر الحاجات اللي بتحبها لو تحب
بس لازم ييجي عليك وقت وتهدي فيه
لازم تفكر بهدوء وتقعد مع نفسك
وتشوف ايه اللي استفدته من التجربة دي !!
ربنا بيحبنا كلنا وعشان نثبت احنا كمان بنحبه ولا لأ بيقوم حاططنا ف تجارب فاشلة
في مواقف صعبة وصدمة كبيرة عشان يشوفنا هنعمل ايه ؟
هنستمر ف الغلط ؟ ولا هنفوق ونتعلم ؟
حط ف اعتبارك انك لو مغلطتش يبقا فيه حاجة غلط
ونك لو متصدمتش ف حد او ف حب او ف حاجة عمرك ماهتتعلم ولا هتستفيد
انا عن نفسي بفرح اوي لما اكتشف خيانة صاحب
او اتصدم ف حد بحبه
او استأمن حد بحبه علي حاجة ويفشيها
أو تتقالي كلمة من واحدة ملهاش أي لازمة
لأن الموقف دة بيفوقني ..بيصحصحني ويخليني اقعد اعيد حساباتي
متزعلش من الغلط ابدا
ازعل لو انك عرفت انك غلط ومع ذلك مستمر فيه
ازعل لو انك عرفت انك مضحوك عليك وخليتك لعبة او لبانه ف أيد حد
دة اللي تزعل منه
لكن تفشل ف دراسة
او تحب حد ميقدرش حبك
او تفشل علاقتك بحد بتحبه
يتزعل منه اه بس جنب الزعل تحاول تستفيد ..
عشان لسه فيه قرارات جاية ف حياتك لازم تاخدها ولازم تاخدها صح
لسه فيه ناس هتقابلهم ف حياتك ف لازم تتعلم ازاي تفرق مابين البني ادم الكويس ومابين البني الل.....
لسه هيتعرض عليك حاجة معينة ف تعرف تاخد فيها قرار كويس
لسه هتسمعي كلمة حب من واحد ف تقدري ساعتها تحكمي اذا كان صادق ولا كذاب
كل دة هتتعلميه من تجربة حب فاشلة عديت عليك
او من خلال موقف او صدمة تشوفها ف حياتك
هو دة الجانب اللي لازم نبص عليه ع اي موقف تتعرض ليه ف حياتك
انك تتعلم منه وتستفيد منه
وتكسب منه
وتقول ف بالك "
كويس انا اتعلمت منه حاجة ..ع الأقل عرفته علي حقيقته
الموضوع روعه روعه تسلم ايديكي