الحب بيبان علي صاحبه
الحب بيطبًُع ع الوش
الحب من غير كلام جنبه
احساسه مش بيغش
والعاشق فضحاه عيونه ولمسه ايديه
والعاشق مهما خبًُا دقته بتبان
واللي مش بيحب حتي من نظرته بتبان
حتي ولو كان ..بميت ألف وش
الحب بيبان علي صاحبه
الحب بيطبًع ع الوش
لو حد قالك انو بيحبك قوله لو بتحبني بجد كان بان عليك ، الحب مش مجرد كلمة تتقال ولا حاجة تتعمل ، الحب احساس بيتحس ونا من اكتر الناس اللي بعرف من عنين اللي قدامي اذا كان بيحبني أو لأ ..ومن كلام اللي قدامي إذا كان بيحبني أو لأ ..ومن نظرة اللي قدامي اذا كان بيحبني أو لأ ،
اكتر حاجة بتضايقني أوي لما الاقي اتنين مرتبطين ببعض مش بيحبوا بعض
معلش كلامي نهاردة ممكن يكون صعب وممكن يكون جارح وممكن يكون سبب لناس تفسخ خطوبتها بناس وممكن تكون سبب لناس تقطع علاقتها بناس ، لأنها هتخليها تفهم وتعرف وتتأكد من حاجة جواها ومش متأكدة منها
ألا وهي الارتباط ونت مش بتحب
عادي اوي ترتبط بحد او تخطب حد او حد يخطبك ونت حبه ونت مرتبط بيه وبتحبه
او تجوزه ، لكن مش عادي أبدا أما تلاقي نفسك بترتبط بحد لمجرد الارتباط او انك لازم ترتبط ونت مش بتحبه ..علي أمل انك يوم م الأيام تحبه او يخليه يحبك أو مش شرط انو يكون فيه بنكوا حب
او ارتباط وخلاص ..جواز والسلااام
هو مش شرط الحب بس ع الأقل يبقا عندك رغبة انك تحبه لكن اللي بشوفه ان
ممكن احب حد ومستخسرش فيه حاجة وهو لا بيحبني بجد ولا هيرتبط رسمي وآجي ع اللي عاوز يرتبط بيا أستخسر فيه الحب دة وجايز اوي مش اديهوله ..
النهاردة الصبح لفت انتبااهي حاجة غريبة أوي
اتنين كان باين اوي انهم مخطوبين لبعض ..هتقولولي عرفت ازاي ما جايز يكونوا مرتبطين بس او بيحبوا بعض .أقولكوا لأ بيبان
زي ماقولت ف الاول الحب بيبان ع الوش فعلا الحب بيبان ع الوش
ولو مبانش انا بعرفه من العنين ومن لمسة الايد للأيد ومن وقوفك جنبه ازاي ومن كلامه معاك ومن سكوته ومن أي حاجة ..معرفش ليه بعرف ومعرفش ليه دايما اللي بحسه بيكون صح ..
من أول نظرة قولت دول مرتبطين ببعض ارتباط صالونات ، عادي ..رغم انها حاولت كتير تبان سعيدة لكن مكانش باين عليها دة ، ابتسامتها مش طالعا بجد ..ضحكتها مش من قلبها ، رغم انو كان باين عليه حد كويس بس هي مش مبسوطة ..
اللي حصل انه واقف جنبها ف مترو وبيكلموا علي فترات ، وزي مايكون كلام ع القد ، قعدت وهو لسه واقف ..بصيت ف عنيها لاقتها كأنها مش معاه خالص ، شاردة شرود بعييييييد أوي
بتحاول تضحك ف وشه وتكلم معاه بس مش قادرة ، جم يقوموا حاول يمسك ايديها سحبت ايديها مش كسوف لأ ..رفض وكأن احساسها بيقول أنا مش قادرة أكمل بس لازم ..لأن هو دة اللي موجود
واللي حبيته ياهو مش جاهز يا هو مش عاوز ..
ومشيواا..تخيلت انا النتيجة ايه بعد كدة , بعد الجواز ..يأما جواز هتكون مدته قصيرة أوي يأما الجواز يبقا مع ايقاف التنفيذ ..
دة كل الحكاية ودة كل الموضوع نهاردة
الغريب أن دة بيحصل كتير اوي ، بنت تتخطب لواحد وهي مش عايزاه وعنيها علي غيره أو ع الأقل هي مش بتحبه وهو جواز وخلاص ..وولد يخطب واحدة وهو كان لسه بيحب واحدة تانية وهي خطوبة وخلاص ..
وكل واحد فاكر التاني بيحبه او التاني عاوزة لكن مش بيشوف دة أو مش عاوز يشوف
عاوز تعرف أو تتأكد من مشاعر اللي قدامك ناحيتك , من مشاعر حد انت مرتبط بيه رسمي؟
بص ف عنيه ، تابع حركة شفايفه ، درجة ابتسامته ..محاولتك لمسكة ايده ، من خلال بصته ليك هتقشعرك ولأ لأ ..مسكته لأيدك هتحررك ولأ لأ؟ ضحكته طالعه بصوت ولأ لأ ؟
ف مرة كنت هرتبط بواحدة رسمي وقعدت انا وهي ف كافية نتكلم
كانت عاوزة تجوزني اكتر م انا كنت عاوز اتجوزها ..بس حبيت مظلمهاش وأديها حقهاا
قولت اشوفها زي ماهي شيفاني
قعدت معاها ومن اول قعدة قولت انها مبتحبنيش ..لكن حبًُة انها تجوز وبس
عرفت منين وازاي؟ عرفت من نظرة عنيها لما وحنا بنكلم لاقتها شردت لحظة بعيد ..بصت ناحية تانية ؟ ساعتها عرفت من حركة دي ..
قولتلها بصراحة : لو قولتلك علي احساسي لو صح توعديني تقولي صح ولو غلط هصدقك ؟
قالتلي أه روحت قولت : انتي مش بتحبيني لكن عاوزة تجوزي صح ولا لأ؟
سكتت ..ساعتها اتأكدت من كلامي وقولتلها تعرفي انا عرفت منين ؟
قالتلي منين ؟
قولتلها .لما بصيتي الناحية التانية ..
اللي بيحب مبيشلش عينه من علي حبيبه
اللي بيحب ..محدش بيطلب منه أعمل كذا وكذا لأنك بتحبني لأنه بيعمل لوحده
اللي بيحب ..مبيقولش معلش واسف كتيير علي حاجة مفروض يعملها لحبيبه
اللي بيحب بيعرف ..وبيفهم اللي قدامه
..............نصيحة
محدش يرتبط بحد مبيحبوش حتي ولو قعدت عمره 40 سنة من غير جواز
محدش يحط ايده ف حد مش حاسس بيه
محدش يلبس دبلة حد ف ايده وقلبه مع حد تاني
لأنه حرام ..حرام عليك نفسك وحرام عليك مشاعر الحد اللي انت ارتبطت بيه !!
لما بترتبط بحد مبتحبوش تبقا بتظلمه وتظلم نفسك معاه ...
